Tokante Karchi 60+

Trabounan pa introdusí Stichting Karchi 60+ a kuminsá for di den aña 2000. E dos organisashonnan ku tabata na kuna di Stichting Karchi 60+ ta Raad voor Ouderen Beleid i Buro Maatschappelijk Consulent (BMC). Na aña 2000 BMC a organisá e promé "Expo 50+ i Futuro 50+", kaminda e karchi di deskuento pa nos grandinan a wòrdu introdusí. Despues di hasi un enkuesta bou di e hende grandinan di Kòrsou i Boneiru, Stichting Karchi 60+ a wòrdu lanta na Yanüari 2001 i a kuminsá ku e promé servisionan. Te ku aña 2004 Stichting wòrdu di spònser dor di BMC, Sra. Riedel-Rafaela, ku ta e dirèktùr di BMC, RBTT, Brox Shoes, diferente otro negoshinan i personanan priva. Na 2005 Stichting a haña supsidio di AMFO i esei a sigui te ku aña 2012.

Stichting Karchi 60+ ta orguyoso di bisa ku e ta disponé di trahadónan hopi dediká ku hopi amor pa nan trabou i hende grandi. Hopi be nan ta bai mas leu ku loke nan trabou ta rekerí pa yuda i asistí nos hende grandinan.

SENTRO DI AKTIVIDAT 60+

Na 2009 nos a kuminsá ku un sentro di aktividat kaminda nos hende grandinan por bini sosialisá ku otro i tambe partisipá ku e diferente aktividat nan ku nos tin diariamente. E aktividatnan ta selekshoná a base di loke nos hendenan ta pidi i nan mester kontribuí pa stimulá salu físiko i mental. Tambe tin aktividatnan ku ta sirbi pa prevení problemanan den futuro. Pa mas informashon por selekshoná e opshon Services.